Төв аймаг-Кангвон мужийн хамтын ажиллагааны уулзалт болов

 Бүгд Найрамдах Солонгос Улсын Кангвон мужийн төлөөлөгчид Төв аймагт зочилж “Төв аймаг-Кангвон мужийн хамтын ажиллагааны уулзалт”-д оролцлоо.

Уулзалтад Кангвон мужийн захиргааны Олон улсын харилцаа, худалдааны хэлтсийн дарга Баек Сэүн Хам, Монголын асуудал хариуцсан мэргэжилтэн И Сү Ён, Хөдөө аж ахуйн асуудал хариуцсан мэргэжилтэн Чой Юу Сол нар  оролцсон байна.

Мөн Төв аймгийн Засаг даргын тамгын газрын дарга Б.Отгонбат, Иргэдийн төлөөлөгчдийн хурлын ажлын албаныхан оролцов.

Төв аймаг-Кангвон мужтай найрамдалт харилцааны хүрээнд 20 жил хамтын ажиллагаатай аж.

Энэхүү уулзалтын хүрээнд хэрэгжүүлдэг төсөл хөтөлбөр, сургалт солилцооны хөтөлбөрийн цар хүрээг нэмэгдүүлэхээр ажлын хэсгийг байгуулж дараах үйл ажиллагааг хамтран хэрэгжүүлэхээр тохиролцов.

1. Солонгос Улсын захирагч нарын холбооноос хэрэгжүүлдэг “К2Н Төрийн албан хаагч солилцооны хөтөлбөр”-т жил бүр 2 албан хаагч хамруулах
2. Кангвон мужийн хөрөнгө оруулалтаар баригдсан хүлэмжийн паркийн ажиглалтыг сайжруулахын тулд тус мужаас тоног төхөөрөмж, засвар үйлчилгээний дэмжлэг үзүүлэх

3. Эрүүл мэнд, ХАА-н мэргэжилтэн харилцан томилж туршлага судлуулах

4. Төв аймгийн ЕБС-ийн сурагчдад зориулан Солонгос хэлний дугуйлан хичээллүүлэх, сурагчдыг мужийн тэтгэлэгт хөтөлбөрт хамруулах

5. Төв аймгаас Кангвон мужид улирлын чанартай гэрээт ажилтан гаргах талаар судлах

6. Муж аймгийн аж ахуйн нэгж, бизнес эрхлэгчидийн харилцан уулзалт, зөвлөгөөнийг зохион байгуулах

7. Зүүн Азийн бүс нутгуудын аялал жуулчлалын холбоогоор дамжуулан аймгийн аялал жуулчлалыг хөгжүүлэх талаар харилцан санал солилцов.

Мөн 2024 онд аймгийн иргэдийн Төлөөлөгчдийн хурал Кангвон мужийн иргэдийн Төлөөлөгчдийн хурал хооронд найрамдалт харилцааны “Санамж бичиг” байгуулж хамтын ажиллагааг эхлэхээр болов.