newslifemn
Монгол Улсын Соёл, спорт, аялал жуулчал, залуучуудын яам Төв аймаг хамтран Барга түмний их хүндэтгэл, ёслолын илэрхийлэл “Баргажин-2025” наадмыг Зуунмод сумын Өв соёлын өргөө цогцолборт зохион байгуулж байна.
Наадмын нээлтийн үйл ажиллагаанд Төв аймгийн ИТХ-ын дарга Н.Энхболд, Засаг дарга Л.Төмөрчөдөр, Соёл, спорт, аялал жуулчлал, залуучуудын яамны Төрийн нарийн бичгийн дарга Б.Даваацэрэн, аймгийн Засаг даргын зөвлөх бөгөөд “Баргажин-2025” наадмыг зохион байгуулах ажлын хэсгийн дарга Б.Отгонбаяр, аймгийн ЗДТГ-ын дарга С.Цогбаяр болон гадаад, дотоодын зочид, төлөөлөгчид, Дорнод, Говьсүмбэр, Улаанбаатар хот, 27 сумын төлөөлөл, Зуунмод сумын иргэд, наадамчин олон оролцож байна. “Баргажин-2025” наадмын нээлтийг баатарлаг хөвүүдийн их үйлсээс сэдэвлэн зохиомжилсон бөгөөд Манлай Баатар Дамдинсүрэн морь хөлөглөн Галзууд хал, Шарайд хал, Харгана хал, Хальбан хал, Хөвдүүд хал, Бодонгууд хал, Цагаангууд хал, Хуасай хал, Хүйслэг хал, Гучид хал, Донгоод хал, Еншөөбү буюу Өнчөөвөд хал, Авгачуул хал, Жоргоон буюу Жорон хал, Улиад хал, Өзөөн хал, Сээхар хал, Алтчин хал, Нумчин хал, Дайртан хал овгийн жагсаалыг түүчээлэн орж ирсэн хэсэг наадамчин олны их хүндэтгэлийг хүлээсэн юм. Мөн нээлтийн бас нэгэн чимэг нь Баргадай баатрын түүхээс улбаалсан “Алтан туурайн гайхамшиг” компанийн “Сэртэн” морьтон цогцолборын морин циркийн үзүүлбэр байв.
Авдарбаяны барга: Баргын Манлай Баатар Дамдинсүрэнгийн нөлөө, Монгол Улстай нэгдэх хүсэл зорилготой нутгийн хамба лам Базаргарьдоо, гүн Жамбал нарын удирдлагаар Хөлөнбуйрын Шинэ барга баруун гарын Гүл шар хошуунаас 240 гаруй өрх, 1340 хүн ам, 100000 хол давсан мал сүрэг бүхий баргачууд 1917 оны зун нүүн Монгол Улсад ирж Улз гол өгсөн нүүсээр Чандганы талын аргын уулсаар өвөлжиж, 1918 оны хавар эрт Хэрлэн гол гатлан малаа төллүүлээд зуны сүүлч намрын эхээр Богд уулын өвөр Авдарын уулын орчин нутаглажээ. Нүүдлийг тухайн цаг үеийн баячууд эхлүүлсан байдаг бөгөөд удирдсан хүмүүс нь их хүрээнд ирж Богдод бараалхан шавь болох хүсэлт гаргасныг Богд хаан ёсоор болгож өөрийн Их шавийн овогт авч Манзушри хутагтын шавь болгон Авдар баян уулын нутагт газар олгон суулгаснаар Авдарбаяны барга хэмээн нэрлэгдэх болсон байна.
https://www.facebook.com/share/p/1SAUBUckJr/
0 cэтгэгдэлтэй