newslifemn
Нийслэлийн ерөнхий боловсролын Хөгжил сургуульд 2026-2027 оны хичээлийн жилд 125 бүлгийн 4600 гаруй сурагч суралцах бөгөөд энэ жил 105-р цэцэрлэгийн өргөтгөл байранд “Гэрт ойрхон сургууль”-ийг нээж нэгдүгээр ангийн 8 бүлгийн 240 гаруй хүүхдийг хамруулаад байна. УИХ-ын гишүүн Н.Алтаншагай, НИТХ-ын төлөөлөгч Ж.Сандагсүрэн нар Хөгжил сургуулийн хичээлийн шинэ жилийн нээлтэд оролцлоо.
Хөгжил сургуулийг түшиглэн БНСУ-ын “KT&G” нийгмийн халамжийн сангийн санхүүжилтээр Мэдээлэл, технологийн боловсролын иж бүрэн төвийг байгуулж байгаа юм. Тус төв нь мэдээлэл, технологийн сүүлийн үеийн техник тоног төхөөрөмжтэй таван ангитай байх бөгөөд нэг ангид 18 хүүхэд суралцахаар төлөвлөсөн байна.
Сурагчдад мэдээллийн технологийн боловсролыг орчин үеийн техник, төхөөрөмж дээр олгох, мэдээллийн технологийн эринд хүүхэд залуус хөл нийлүүлэн алхах, дэлхийн хэмжээний чадварлаг боловсон хүчнийг бэлтгэх зорилгоор энэхүү төслийг “Global Civic Sharing” ТББ-тай хамтран эхлүүлсэн билээ. Мэдээлэл, технологийн боловсролын төвийг энэ оны 11 дүгээр сард ашиглалтад оруулахаар ажиллаж байна.
0 cэтгэгдэлтэй